Deklaratë mbështetëse e Fakultetit të Arteve në Universitetin Shtetëror të Tetovës që lulëkuqja të bëhet simbol i përkujtimit të gjenocidit në Kosovë

UNIVERSITETI SHTETËROR I TETOVËS

FAKULTETI I ARTEVE

DEKLARATË MBËSHTETËSE

Që lulëkuqja me katër petale të bëhet simbol i përkujtimit të gjenocidit në Kosovë

Gjenocidi është krimi më i shëmtuar dhe më mizor që njeh historia njerëzore. Duke përcaktuar për qëllim shkatërrimin e një grupi kombëtar, etnik, racor ose fetar si të tillë, kryerësit e gjenocidit godasin tërë njerëzimin!

Krimi i gjenocidit që shteti serb zbatoi kundër shqiptarëve të Kosovës, dëshmitarë të së cilit ishim ne, është krimi më monstruoz i fundit të shekullit XX. Është për keqardhje që edhe pas një çerek shekulli nga koha e kryerjes së gjenocidit serb ndaj shqiptarëve nuk kemi një simbol që do të pasqyronte këtë krim.

Kërkesa e Qendrës “Gjenocidi në Kosovë-Plagë e hapur” që lulëkuqja me katër petale të bëhet simbol i viktimave të gjenocidit në Kosovë ka ngjallur interesimin tonë të madh.

Pasi e analizuam hollësisht propozimin e kësaj qendre, ne vendosëm të dalim me një deklaratë publike:

Lulëkuqja me nuancat e ngjyrës së flamurit tonë kombëtar, që pasqyron se qëllimi serb ishte shkatërrimi i tërësishëm ose i pjesshëm i shqiptarëve si komb;
Pasqyrimi i figurave të burrave, grave, djemve dhe vajzave në vend kokrrave të zeza të farës së lulëkuqes, për të kujtuar njerëzit e të gjitha moshave dhe gjinive që ishin viktima të këtij gjenocidi;
Prerja e lulëkuqes në katër petale për të përfshirë katër format e akteve gjenocidare, që Serbia zbatoi gjatë luftës së fundit në Kosovë (vrasjet, dhuna seksuale, spastrimi etnik dhe shkatërrimi i objekteve që lidhen me përkatësinë etnike dhe identitetin shqiptar);
Prerja e petaleve të lulëkuqes në atë formë që të transmetojnë mesazhin se kemi të bëjmë me plagë të hapura, nga rrjedh gjaku i pafajshëm i viktimave shqiptarë të këtij gjenocidi;
Vendosja e petaleve në formë të shkronjës X, për të pasqyruar faktin se gjatë luftës, në disa vendbanime ku popullsia ishte e përzier në aspektin e përkatësisë etnike, okupatorët serbë kishin shënjuar shtëpitë e shqiptarëve me një X, me qëllim që të udhëzoheshin forcat e armatosura serbe drejt vendeve ku duhej të kryheshin krimet;
Dhe elemente të tjera që ka lulëkuqja e propozuar nga Qendra “Gjenocidi në Kosovë-Plagë e hapur” është një realizim i shkëlqyer profesional.

Prandaj, ne si profesorë të artit në Universitetin e Tetovës i japim përkrahjen e plotë dhe pa rezervë që lulëkuqja me katër petale të bëhet simbol i përkujtimit të gjenocidit në Kosovë.

Dekani: Prof. ord. Mr. Senad Abduli

Prodekan për shkencë: doc. Dr. Jëlldëz Asani

Profesorë ordinar: